المساعد الشخصي الرقمي

مشاهدة النسخة كاملة : نــــــــــــــــورة للعملاق حميد / اداء الاستاذ محمد جباره


البلابى
29-03-2008, 04:20 PM
نـــــــــــــــورة / للعملاق حميد / اداء الاستاذ محمد جباره


هي .. أقيفن .. نورة فيكن
نورة نقاحة الجروف ..
نورة حلابة اللبيني .. للصغيرين والضيوف
نورة ساعة الحر يولع .. تنقلب نسمة وتطوف
تدي للجيعان لقيمة
وتدي للعطشان جغيمة
والمخلي الحال مصنقر ..
في تقاة الليل تندقر .. تدي لي باكر بسيمة
تكسي للماشين عرايا وفوقا إنقطع هديما
ما عرفتن نورة إنتن .. قولن إنتن شن عرفتن
نورة بت الواطة أخيتي .. نورة اخت كل الغلابة
نورة حاحاية الشقاوة .. نورة هداية الضهابة
الاراضي الياما أدت .. نورة بقت من ترابا
وماشي في الأعماق سحابا
مشتهنها .. والله جابا
للجنوب طبلاً يهدهد .. لي مشاعر ناس تعابة
وللشمال طنبور يسكت .. دمعة الميتين كآبة
ما عرفتن نورة إنتن .. قولن إنتن شن عرفتن
نورة عايز تقرأ قالت
فوقا حيطة الدنيا مالت
ختت الكراس وشالت
منجلاً صالت به جالت
لامن إنجرحت به شالت
للتراب فوق إيدا كالت
ومرة يوم في الدونكا لدغت
جاء الفقير بالليل حواها
ويوم ملاها الهم قطايع .. جاء البصير بالنار كواها
ونورة ما قدرت تمانع .. تقنع الناس المعاها
ومرة شافت في رؤاها طيرة تاكل في جناها
حيطة تنمغى وتفلع .. في قفا الزول البناها
في جنينة سيدي سمعت .. تمرة تصقع للوراها
الأرض لابد ترجع للتعب فوقا ورعاها
شافت النيل موجو لاها
الخليقة بقت إلاها
الشمس طبقت ضحاها
نار عقاب إنساب مكسر .. فوق تكليات متاهة
وضو من الله .. رهاب مكتف في وتيد الليل معاها
بين حضر بلدا وخلاها
فسرت للناس رؤاها
وقالوا جنت ومو براها
ونورة زادت فوق شقاها
وصدت الأيام تخش
تبني لي عصفورة عش
في السواقي تشوف عزاها
لما شوقا يسوي .. وش
تسقي تزرع
تسعى تصنع
للنهار في الليل تخش
عرفت الشقا والشقاوة إلا ما عرفت تغش
شايلة طولة البال من الله .. ومن أراضينا الإثارة
وماشي تكدح طول نهارا
وترجى لما الليل يفلل .. تسرق ألمي عشان خدارا
عشان صغارا
ولما ترجع لي ديارا
تنزف أحلام الفقارى
من عويناتا الحيارى
لي غبار الحال تقش
فوقو للآمال ترش
نورة تقعد صاحي تحلم .. بي بيوت بي نور ودش
وبالمحبة تشق دروبا .. ولي قلوب الكل تخش
نورة تحلم بي وجود
ما مشت بينو القيود
أفضل أفضل بي كتير .. بي وطن من غير حدود
نورة تحلم بي عوالم
زي رؤى الأطفال حوالم
لا درادر .. لا عساكر .. لا مظاليم لا مظالم
نورة تحلم .. ولما تحلم نورة ترجف
ولما ترجف نورة تحلم ..
ولما ريح الواقع المر .. لي عشيش أحلاما ينسف
نورة تنزف
ولما تنزف بالا يهتف .. يوم حا تنصف يوم حاتنصف
وتبدأ تحلم .. ولما تحلم نورة ترجف
ولما ترجف نورة تحلم
صاحي تحلم.. وصاح بتحلم
صاح بتحلم

نادر حسن سعيد
30-03-2008, 09:39 AM
نورة حلابة اللبيني .. للصغيرين والضيوف
نورة ساعة الحر يولع .. تنقلب نسمة وتطوف
تدي للجيعان لقيمة
وتدي للعطشان جغيمة

ما احلاها صورة
و ما اجمله شعر و تصوير بديع من المتفرد دوما حميد
لك التقدير البلابي ... و ربنا يحقق احلام نوره و يرجعكم بالسلامة

البلابى
30-03-2008, 02:29 PM
اسعدنى جداً مرورك ولك كل الود على كلامك الراقى وشكراً كثير

وتبدأ تحلم .. ولما تحلم نورة ترجف
ولما ترجف نورة تحلم
صاحي تحلم.. وصاح بتحلم
صاح بتحلم[/align]

البلابى
13-09-2008, 02:10 PM
اسعدنى جداً مرورك ولك كل الود على كلامك الراقى وشكراً كثير

وتبدأ تحلم .. ولما تحلم نورة ترجف
ولما ترجف نورة تحلم
صاحي تحلم.. وصاح بتحلم
صاح بتحلم[/align]

وانا زاتو نائم احلم وصاحى بحلم
الحل شنو الربيجود

منتصر سيداحمد
13-09-2008, 05:51 PM
لك التحيه البلابى وانا من المعجبين جدا بالرائع حميد مع انى لافهم معظم قصائده .لاكنى استمتع بسماعها ولو لقينا مفسر لقصايد حميد يكون كويس

خالد(الجود)
13-09-2008, 10:16 PM
اجمل ما في القصيدة يا منتصر ان كل شخص يفسرة علي هواه - ويفصلة علي قضيتو - ويجد حلول لمشاكلة بداخلة - ويجد سلوي .

هذه القصيد جملية جداً ومن اروع ماكتب القامة حميد - والاجمل انها وجدت من اداها باجمل واعذب الالحان - سلسة تدخل قلبك

شايقية للابد
16-09-2008, 01:26 PM
البلابى شكراً لإثرائك لهذا المنتدى بالدرر

فى إنتظار هذا الجمال كثيراً
لك منى كل الود

البلابى
17-09-2008, 01:54 PM
الاخوان الاعزاء الاخ منتصر والاخ خالد الجود
والاخت شايقبة للابد
شكراً واسعدنى جداُ مروركم

تخريمة للكلام السمح دة

ونورة زادت فوق شقاها
وصدت الأيام تخش
تبني لي عصفورة عش
في السواقي تشوف عزاها
لما شوقا يسوي .. وش

لكم منى اطيب الامانى

البلابى
17-09-2008, 01:55 PM
الاخوان الاعزاء الاخ منتصر والاخ خالد الجود
والاخت شايقبة للابد
شكراً واسعدنى جداُ مروركم

تخريمة للكلام السمح دة

ونورة زادت فوق شقاها
وصدت الأيام تخش
تبني لي عصفورة عش
في السواقي تشوف عزاها
لما شوقا يسوي .. وش

لكم منى اطيب الامانى